Սյունիքի մարզում ՀՀԿ-ի օգտին լավագույն ցուցանիշներ են գրանցվել, սակայն մարզպետ Սուրիկ Խաչատրյանը շատ անտրամադիր էր: Նա  ջղային հայացքով հետեւում էր Աշոտ Գիզիրյանի մեկնաբանություններին: Երբ ուզում էինք իրեն հարցեր ուղղել, դեմքն ավելի մռայլվեց:

– Պարոն Խաչատրյան, ինչո՞ւ եք մռայլվել, Դուք էլ հո հաղթանա՞կ եք տոնել: 

– Մեկ-մեկ լավ առիթներից էլ ես ուզում…. (միտքը կիսատ թողած, սկսեց հռհռալ՝ Գ. Ս.):

– Համամասնական ցուցակում անցողիկ տեղում եք, հիմա խորհրդարա՞ն եք գնալու, թե՞ մնալու եք մարզպետի պաշտոնին:

– Ես մնալու եմ մարզպետ: Ես ուզում եմ ժողովրդին ծառայել:

 – Բայց ժողովուրդն այն կարծիքին է, որ Սյունիքը Ձեր լծի տակ է, վախի մթնոլորտ եք ստեղծել: 

– Հիմա տեսաք, չէ՞, էդ ասող-խոսողները մեկ-երկու անասուն են: Դուք տեսաք, չէ՞, թե ժողովուրդը ոնց ա ինձ հարգում ու սիրում: Արդյունքը սա էր: Հաջող ընտրությունները մեր լավ փոխհարաբերությունների արդյունքն էր, էլ ավելի լավ ի՞նչ եք ուզում:

– Այս դեպքում ինչո՞ւ է ողջ Հայաստանում այն տպավորությունը, թե սյունեցիները Ձեր լծի տակ են ապրում:

– Դա մեկ-երկուսի կարծքին ա, իսկ ընտրությունների արդյունքը ցույց տվեց, որ մարզպետ-ժողովուրդ ջերմ հարաբերություններ են: Եվ այդ վստահության արդյունքում երիտասարդ տղան ընտրվեց, որովհետեւ ժողովուրդը վստահեց մարզպետին, եւ էս պայմաններում չեմ կարծում, որ նման հարցերը տեղին են:

 – Պարոն Խաչատրյան, ճի՞շտ է, որ հարյուր հազար դոլարի վրա գրազ եք եկել, որ ՀՀԿ-ի օգտին 80 տոկոս ապահովելու եք:

– 80 տոկոս ապահովել եմ, իմ ծննդավայրում եղել ա 79 տոկոս, իսկ 100 հազարը որ կրեմ, կեսն էլ քեզ եմ տալու…

– Սիլվա Համբարձումյանի հետ Ձեր հարաբերությունները հարթվեցի՞ն:

– Էդ արդեն քեզանից պիտի հարցնեմ, դու ավելի լավ կիմանաս…