Շառլ Ազնավուրը կոչ է անում սատարել Սարկոզիին

12:00 5 Մայ, 2012

Ինչպես տեղեկացնում է «Ինտերֆաքս» լրատվական գործակալությունը, Ֆրանսիայի հայտնի 20 անձինք հայտարարություն են տարածել, որում կոչ են արել նախագահական ընտրությունների երկրորդ փուլում քվեարկել Նիկոլա Սարկոզիի օգտին: Պարբերականի փոխանցմամբ, հայտարարությունը, որը հրապարակված է Ն. Սարկոզիի կայքում, ստորագրվել է ֆրանսահայ երգիչ Շարլ Ազնավուրի, ֆրանսիացի դերասան Ժերար Դեպարդյեի, կինոռեժիսոր Կլոդ Լելուշի և մի շարք այլ համաշխարհային ճանաչում ունեցող ֆրանսիացի դերասանների, գրողների, կինոգործիչների և հրատարակիչների կողմից:

«Պետք է ճիշտն ասել մեր բյուջեի, ներգաղթի, աշխարհում տիրող իրավիճակի և Եվրոպայի ապագայի վերաբերյալ: Պետք է ճշմարտությունն ասել. անհրաժեշտ է շարունակել բարեփոխումներ իրականացնել՝ փրկելու այն սկզբունքները, որոնց վրա է ձևավորված մեր ազգը»,-նշված է հայտարարության մեջ: