Այսօր Վրաստանի խորհրդարանի լիագումար նիստի ընթացքում ընդդիմադիր կուսակցության առաջնորդ Ջոնդի Բագատուրիան բարձրացրել է Հայոց ցեղասպանության ճանաչման հարցը:
Ինչպես հայտնում են վրացական լրատվամիջոցները, Բագատուրիան նշել է. «Չերքեզների ցեղասպանության հարցի քննարկման ժամանակ ես ասել էի, որ մենք չպետք է բարձրացնենք այդ հարցը, քանի որ դրան կհաջորդի հայկական հարցը: Իսկ ինչ պետք է մենք ասենք մեր եղբայր հայերին, ովքեր հանդիսանում են մեր հայրենակիցները»:

Բագատուրիայի ելույթի ժամանակ ադրբեջանական ծագում ունեցող պատգամավոր Ազեր Սուլեյմանովը մոտեցել է ամբիոնին և ինչ-որ բան շպրտել Բագատուրիայի վրա: Ի պատասխան Բագատուրիան Սուլեյմանովի վրա գրիչն է շպրտել, ապա սկսել է ծեծկռտուքը:

Ծեծկռտուքից հետո Սուլեյմանովը Բագատուրիային անվանել է «հայ պատգամավոր», ինչից հետո նրա բարձրախոսն անջատել են:

Ինչպես տեղեկացնում են ադրբեջանական կայքերը, պատգամավոր Սուլեյմանովը Բագատուրիայի վրա նետել էր վազելինի փաթեթ:

Խորհրդարանի նախագահ Դավիդ Բակրաձեն խաղաղեցրել է պատգամավորներին և պահանջել վերջ տալ ցեղասպանության մասին բոլոր քննարկումներին, քանր որ «դա շատ ցավոտ թեմա է և դրա քննարկումը կարող է ազդել հարևանների հետ Վրաստանի հարաբերությունների վրա»: