Հայաստանի քաղաքացիները բանկային համակարգով տարեկան ստանում են մոտ 1,5 միլիարդ դոլարի մասնավոր ոչ առեւտրային փոխանցումներ, որոնք սովորական ֆինանսական օգնություն են դրսում ապրող բարեկամներից: Փոխանցումների մեծ մասը գալիս է Ռուսաստանից:

Ընթացիկ տարվա հունվար-սեպտեմբերին տրանսֆերտները կազմել են 1,09 միլիարդ դոլար` ամսական մոտ 121 միլիոն: Դրանց 83,1 տոկոսը ստացվել է Ռուսաստանից: Անցած տարվա նույն ամիսների համեմատ փոխանցումների գումարն ավելացել է 206,2 միլիոն դոլարով կամ 23,3 տոկոսով:

Համեմատության համար նշենք, որ այս տարվա հունվար-սեպտեմբերին Հայաստանի ամսական արտահանումը կազմել է մոտ 108 միլիոն դոլար: Ընդ որում, անցած տարվա նույն ժամանակահատվածի համեմատ աճել է 33,5 տոկոսով: Հաշվի առնենք, որ մասնավոր ֆինանսական օգնությունը Հայաստան մտնում է նաեւ առձեռն` շրջանցելով բանկային համակարգը:

Որպես կանոն, դեկտեմբերին փոխանցումների հոսքը մեծանում է: Սովորական է դարձել նաեւ ամանորյա տոներին ընդառաջ արտարժույթի էժանացումը, թեեւ անկախ փորձագետների կարծիքով, հայկական դրամն արհեստականորեն արժեւորված է:

Նոյեմբերի 18-ին 1 դոլարը 383,95 դրամ էր: Ներմուծողներին էժան դոլար է անհրաժեշտ տոներից առաջ ապրանքների նոր խմբաքանակներ ներմուծելու համար: