Հարցազրույց Հայաստանի Ռամկավար Ազատական Կուսակցության փոխատենապետ Բաբկեն Հարությունյանի հետ:

–Ի՞նչ փուլում է գտնվում Անտինյան–Առաքելյան պայքարը, միթե՞ այդքան դժվար է պարզել, թե ո՞վ է ՀՌԱԿ ատենապետը:

Գիտեք, պայքարը Անտինյանի և Առաքելյանի միջև չէ, այլ ոմանք Անտինյանի միջոցով պայքարում են ՀՌԱԿ-ի դեմ: Իսկ թե ով  է ատենապետը, որոշում է կուսակցության համագումարը: Իսկ Արդարադատության նախարարությունը ընդամենը պետք է արձանագրի համագումնարի որոշումները, ոչ թե պատվերներ կատարի:

–Այդ դեպքում, ինչպես Դուք եք ասում, ինչու՞ են պայքարում կուսակցության դեմ:

Միշտ էլ ավելի հեշտ է աշխատել կամակատարների հետ, որոնք պատրաստ են կատարել ցանկացած հրաման, իսկ որ ՀՌԱԿ-ը Հարություն Առաքելյանի ատենապետությամբ տուրք  չի տվել ճնշումներին և չի գայթակղվել իշխանական  և ֆինանսական միջոցներով, դա փաստ է: Երկրորդ կարծիք լինել չի կարող:

Հարություն Առաքելյանը նշել է, թե ՀՌԱԿ–ի դեմ պայքարողներից է ԱԺ պատգամավոր Վիկտոր Դալլաքյանը

Այո, Վիկտոր Դալլաքյանը մեծ «ներդրում»  ունի կուսակցության դեմ պայքարում: Բայց նա ընդամենը միջնորդ զինվորի կարգավիճակում է: Այս ամենը կատարվում է ազդեցիկ պաշտոնյաներից մեկի ի գիտությամբ: Եվ եթե վերջինս կարծում է, թե իր ճղճիմ և նողկանք առաջացնող քայլերով կարող է խոչընդոտել ավանդական կուսակցության գործունեությանը, ապա չարաչար սխալվում է: Խորհուրդ կտամ, որպեսզի նա ևս մեկ անգամ շարժի իր հեղուկապատ գլխում գտնվող ապազգային զանգվածը` ուղեղը, հասկանալու համար, որ աշխարհասփյուռ Ռամկավար Ազատական Կուսակցությանն արատավորելը իր ուժերից վեր է:

-Եթե այս անգամ էլ Պետռեգիստրը չգրանցի  համագումարի որոշումը, ո՞րն է լինելու ձեր հաջորդ քայլը:

Հավատացած եղեք, մենք հանձնվողներից չենք: եվ ունենք գործիքներ, որոնք մինչ այս չենք կիրառել: Հուսով եմ բանը դրան չի էլ հասնի, բայց եթե դրա կարիքը լինի,  վստահաբար մենք կկիրառենք և այդ ժամանակ ոմանց իրական դեմքը կբացահայտվի:

Հարցազրույցը վարեց

Քնար Մանուկյանը