Հոկտեմբերի 21-ին տեղի է ունեցել Էդվարդ Անտինյանի գլխավորած ՀՌԱԿ արտահերթ համագումարի 2-րդ նիստը (1-ը տեղի էր ունեցել հունվարի 20-ին): Հիշեցնենք, որ ավելի վաղ` հոկտեմբերի 15-ին արտահերթ համագումար էր հրավիրել նաև Հարություն Առաքելյանի գլխավորած ՀՌԱԿ-ը:

Արտահերթ այս համագումարը նշանակալի էր նրանով, որ ներկաներից շատերը, ինչպես իրենք նշեցին, ոչ միայն կուսակցական չէին, այլև տեղյակ չէին թե ուր են եկել և ինչի համար: Բացի այդ, նրանք խուսափում էին շփվել լրագրողների հետ: Նրանցից մեկն eMedia.am-ի հարցին ի պատասխան ասել է. «Այ քուր ջան, մենք էլ չգիտենք թե ուր ենք եկել ու ինչի համար»: Մյուսին էլ խնդրեցինք նշել կուսակցության անունն ամբողջությամբ, ինչին ի պատասխան լսեցինք. «Մի րոպե հարցնեմ ասեմ»: Այսպիսին էր ՀՌԱԿ համագումարի այսօրվա կոնտինգենտը:

Բացի այդ, շատ ավելի հետաքրքիր էր մանդատների հետ կապված պատմությունը: Ներկաներից շատերը չէին ցանկանում ցույց տալ մանդատները, քանի որ դրանց վրայից բացակայում էր կուսակցության կնիքը: Եվ, չնայած, ներկաներից շատերը քվերակելիս մանդատները հակառակ կողմով էին պահում, մեզ հաջողվեց լուսանկարել դրանք:

Առավել զավեշտալին այն էր, որ ներկաների մեծ մասը Մշակույթի նախարարությանը կից Հուշարձանների պահպանության վարչության աշխատակիցներն էին, վարչության նախագահ Վլադիմիր Պողոսյանի գլխավորությամբ: Վերջինս, eMedia.am-ի հետ զրույցում նշեց, որ կուսակցական չէ, համագումարին էլ մասնակցում է, որովհետև հրավիրել են: Իսկ թե ինչո՞ւ էին դահլիճում գտնվում նաև վարչության բազմաթիվ աշխատակիցներ, Վլ.Պողոսյանը չպարզաբանեց, նշելով, որ նախկինում, երբ 2005թ. 3-4 կուսակցություններ միավորվել են ՀՌԱԿ-ին, հնարավոր է նրանք այդ կուսակցության անդամներ են: Ինքն էլ, իր խոսքերով, համագումարում է հանդիպել ու բարևել նրանց:

Ի դեպ, նշենք, որ համագումարը սկսվել էր ժամը 13:00-ին, ավարտվել` 14:10-ին: Ինչո՞ւ են Վլ.Պողոսյանն ու իր աշխատակիցները աշխատանքային ժամին գտնվում համագումարին հարցին ի պատասխան, նա նշեց, որ դա ընդմիջման ժամ է:

Այսպիսիով, համագումարը 1 ժամում ընտրեց նոր վարչության կազմը, վերստուգիչ հանձնաժողովի կազմը և այլն ու ավարտեց իր ախատանքները: