Շառլ Ազնավուր. Ես հարցնում եմ թուրքերին, եթե դա ցեղասպանություն չէ, ապա ինչպե՞ս կոչել ժողովրդի ոչնչացումը

Հոկտեմբեր 06, 2011 | 17:12

Տարբերություն չկա, թե ով կդառնա Հայաստանի հաջորդ նախագահ: Այդ բառերը Nouvelles d`Arménie ամսագրին տված բացառիկ հարցազրույցում ասել է աշխարհահռչակ շանսոնյե, Շվեյցարիայում Հայաստանի դեսպան Շառլ Ազնավուրը:

Նա նշել է, որ իր միակ ցանկությունն է բաց տեսնել հայ-թուրքական սահմանը, որը հնարավորություն կտա Հայաստանին մի քիչ շնչել:  «Հայաստանը տառապում է, եւ ամեն օր Հայաստանը դատարկվում է: Կարճ ժամանակ անց այն ուղղակի կդառնա խխունջ. ո՞ւմ է դա դուր գալու: Մաֆիոզիների՞ն: Ու հարյուր հազարավոր աղքատներ կսփռվեն ողջ աշխարհով մեկ: Այդ իրողություններն ինձ անհանգստացնում են», –  խոստովանել է Ազնավուրը, հավելելով, որ այդ իրավիճակում հայերը շարունակում են կենտրոնանալ «ցեղասպանություն» բառի վրա, որը թուրքերը վիճարկում են:

«Եվ այսպես, ես հարցնում եմ թուրքերին, եթե դա ցեղասպանություն չէ, ապա ինչպե՞ս կոչել ժողովրդի ոչնչացումը: Ինչպե՞ս եք դուք դա ժամանակին անվանել: Ինպե՞ս էր Աթաթյուրքը որակավորել այդ իրավիճակը: Ինչպե՞ս դա կկոչվեր մինչեւ  «ցեղասպանություն» բառը գտնելը: Կոտորա՞ծ: Հայերի կոտորա՞ծ: Եթե դուք չեք ուզում օգտագործել «ցեղասպանություն» բառը, գոնե խոստովանեք, որ դա կոտորած է եղել: Եթե մենք դրան հասնենք, մենք մեծ հաջողություն կունենանք», – ասել է Ազնավուրը:

Մինչդեռ, նրա կարծիքով, քանի դեռ հայերը խոսում եւ խոսում են Ցեղասպանության մասին, նույն թուրքերը հարստանում են եւ զբաղեցնում են էլ ավելի մեծ տեղ արեւի տակ:  «Նրանք արդեն «Մեծ քսանյակի» անդամ են: Նրանք արդեն չեն անհանգստանում Եվրամիություն ընդունվելու մասին: Իսկ ո՞ւր ենք գնում մենք: Հայաստանը լուրջ վտանգի մեջ է, եւ բոլորը հապաղում են «ցեղասպանություն» բառի վրա: Ես չեմ տեսնում, թե ինչում դա կարող է օգնել երկրին առաջ գնալու: Ո՞ւր է տանում մեզ այդ տրամաբանությունը», – հարցադրում է հնչեցրել Ազնավուրը: