ՀՀ ներքաղաքական կյանքի, առաջիկայում քաղաքական  հնարավոր զարգացումների և ՀԺԱՄ ծրագրերի մասին Maxinfo.am–ի հետ զրուցել է ՀԺԱՄ նախագահ Վահրամ Մկրտչյանը:

 

–Ինչպե՞ս եք գնահատում իշխանությունների վարած ներքին քաղաքականությունը:

 

Մեզ մոտ իշխանությունները անհասցե բառ է: Իշխանությունն իրականացնում է կոալիցիան, սակայն Հանրապետականի 2 կոալիցիոն գործընկերները` Բարգավաճ Հայաստանը և Օրինաց երկիրը մերթընդմերթ խուսափում են պատասխանատվությունից: Այնպիսի տպավորություն է, որ եթե երկրի նախագահը հանրապետական է, ուրեմն ամեն ինչի պատասխանատուն այդ կուսակցությունն է: Սա առավել ընդգծվում է նախընտրական շրջաանում, քանի որ բոլորը փորձում են քաղաքական պատասխանատվությունից խուսափել: Եթե կոալիցիան իրականացնում է 3 կուսակցություն, ապա  պատասխանատվությունը ևս պետք է կրեն այդ 3 կուսակցությունները, որպեսզի ժողովուրդը հասկանա, թե իր դժբախտությունը որտեղից է, իսկ դժբախտությունը եռակողմ է:

 

–Ի՞նչ բացթողումներ կան կոալիցիայի գործունեության մեջ:

 

Մեր իշխանությունների վարած քաղաքականությունը չի բխում փոքր ու միջին  բիզնեսի շահերից: Ամեն ինչ ձևված ու կարված է օլիգարխի հագով: ՀԺԱՄ-ը մասնավորապես պաշտպանում է փոքր և միջին  բիզնեսի շահերը:  Այս թեման շատ է քննարկվում, սակայն ըստ էության արվածը բավարար չէ: Հիմնականում ամեն ինչ մնում է բանավոր հայտարարությունների մակարդակում:  Եթե մեր կառավարությունը, մեր կոալիցիոն կուսակցությունները շահագրգռված լինեին, որ միջին խավը ձևավորվի և փոքր ու միջին բիզնեսը կայանա, ապա իրենք կսահմանափակեին խոշոր գործարարների հնարավորությունները: Օրինակ օրենք կընդունեին, որ խոշոր բիզնեսի հարկերը պետք է կտրուկ բարձրացնել: ՀՀ-ում շահութակհարկը 20% է: Մենք առաջարկում ենք, եթե տվյալ  բիզնեսը  տարեկան 20 մլն դրամ է շրջանառում, ապա պետք է  շահութահարկով չհարկվի, եթե 20-100մլն դրամ է, ապա պետք է  գործի շահութահարկը, իսկ եթե 100 մլն-ից ավել է գործի 30% հարկ, եթե 1 մլն դոլլարից ավելի է, պետք է  հարկվի 50-60%-ը: Դա կնպաստի, որ խոշոր օլիգարխը շատ չտարածվի իր գործունեության մեջ: ՀԱԿ-ը մի ցուցակ էր ներկայացրել, որոմ երևում էր, որ   պատգամավորներից մոտ 75-ը բիզնեսով է զբաղվում: Սա խայտառակ ցուցանիշ է: Այստեղ Սերժ Սարգսյանը պետք է քաղաքական կամք ցուցաբերեր և նրանց առաջ փակի խորհրդարանի դռները: Մեր իշխանությունը լուրջ քայլեր չի ձեռնարկում ժողովրդի աճի խթանման համար: Տարեկան մոտ 40 հազար մարդ է Հաայաստանից հեռանում: Տարեկան մոտ այդքան մարդ էլ ծնվում է: Պետք է խթան ստեղծել, որպեսզի ծնվողների քանակն աճի: Մենք առաջարկում ենք յուրաքանչյուր ընտանիքում 3-րդ երեխային մինչև չափահաս դառնալը  պետությունը 100,000 դրամ նպաստ նշանակի:  Եթե 46 հազար երեխա ծնվի ամեն տարի:Սա տարեկան 126 մլն դոլլար է կազմում Այս գումարի առաջին աղբյուրը կարող է խոշոր բիզնեսից գանձված հարկը լինել, մյուս աղբյուրը կոռուպցիոն ռիսկերի պակասեցումն է, երրորդը ստվերային դաշտի պակասեցումը և այլն:

 

–Ինչպե՞ս եք գնահատում ԱԺ-ում կուսակցությունների գործունեությունը:

 

Ըստ էության Հանրապետական կուսակցությունը ոչ թե կուսակցություն է, այլ վարչական և տնտեսական ռեսուրսի վրա հիմնված կառույց: Կուսակցության համար լավագույն փորձարկումը ընդդիմությունում գտնվելն է: Եթե  հանրապետականը մի  օր ընդդիմությունում լինի, այն ժամանակ կարող եմ ասել, թե այն ինչպիսի կուսակցություն է: Հիմա երկրի նախագահից, վարչապետից, ԱԺ նախագահից մինչև մարզպետները հանրապետական են, ինձ համար դա արդեն կուսակցություն չէ: Կուսակցություն չէ նաև այն ուժը, որը միայն տնտեսության  և բիզնեսի վրա է հիմնված: Դաշնակցության և Ժառանգության գործունեությունը դրական եմ գնահատում: Դաշնակցությունն ընդդիմությունում ավելի ազգանպաստ գործունեություն է ծավալում:

 

–Ի՞նչ գնահատական կտաք ՀԱԿ–իշխանություն  երկխոսությանը:

 

Արտահերթ ընտրություններն աբսուրդ է: Նա, ով դա ասում է անգրագետ է: Ընտրական օրենսգիրքը և նախագահի լիազորությունները հասկացող մարդը հիմա նման հարց չէր բարձրացնի: Գարնանը դեռ կարելի էր այդ թեման բարձրացնել, բայց սեպտեմբերին խոսել այդ մասին… դա քաղաքական իմիտացիա է, ՀԱԿ-ը դա անում է, որպեսզի պահի իր ընտրազանգվածը: Այս առումով իշխանությունը փայլուն ձևով խաղարկեց դա, թեման քննարկվեց, քննարկվեց… վերջում ասացին, որ արտահերթ ընտրություններ չեն կարող լինել և բանակցային գործընթացն ավարտվեց: Ընդհանրապես ընդդիմության հետ բանակցելը լավ է, սակայն ավելի լավ կլինի, որ ավելի լայն զանգվածներ ինտեգրվեն գործընթացին` քննարկելու ՀՀ ապագան: Քննարկումներին պետք է մասնակցեն նաև Դաշնակցությունը, Ժառանգությունը, արտախորհրդարանական ուժերը: Իսկ ո՞վ է ասել, որ քաղաքական ընտրանին ՀԱԿ-ում է: ՀՀ-ում ձևավորվում են լուրջ երիտասարդական լուրջ ուժեր, որոնք վաղը ՀԱԿ-ին էլ, այսօրվա իշխանությանն էլ ավլելու են պրոցեսից:

 

ՀՀ վարած արտաքին քաղաքականության մասին ի՞նչ կասեք:

 

Ընդհանուր առմամբ արտաքին քաղաքականությունը նորմալ եմ գնահատում: Չեմ կարող ասել փայլուն, բայց նորմալ: Կցաանկանայի, որպեսզի ՀՀ-ն ամեն ինչ աներ, որպեսզի ղարաբաղը վերադառնար բանակցային գործընթաց ոչ թե որպես սուբյեյկտ, այլ կողմ:  Պետք է բարձրացնել նաև Հյուսիսային Արցախի խնդիրը, ինչի մասին  քննարկումների ժամանակ չի խոսվում:

 

Ինչպե՞ս է պատրաստվում ՀԺԱՄ–ը առաջիկա համապետական  ընտրություններին:

 

Մենք փորձում ենք գործընկերներ գտնել և լայն ճակատ ձևավորել: Դրանք հիմնականում լիբերալ գաղափարներ կրող ուժերն են:

 

Խոսակցություններ են պտտվում, որ հավանական է ՀԺԱՄ միավորումը  ԱԺՄ, ԱԺԿ և ԱԺԴ կուսակցությունների հետ: Ի՞նչ կասեք այս մասին:

 

Այդ ուղղությամբ գործընթաց է գնում, սակայն հեռանկարների մասին դեռևս վաղ է խոսելը: ՀԺԱՄ-ը բանակցում է ոչ միայն ԱԺՄ նախկին թևերի, այլև այլ կուսակցությունների հետ, որոնք կիսում են մեր մտահոգությունները:

 

Իսկ ԺԱԿ–ի հետ միավորվելու հեռանկար կա՞:

 

Մելիքյան Սպարտակը իմ լավ բարեկամն է: Նախկինում մենք նույն միավորման մեջ ենք եղել: Շատ լուրջ քաղաքական ուժ է, այնպես որ համագործակցության հեռանկարները չեն բացառվում:

 

Մամուլում շրջանառվում են խոսակցություններ ՀԺԱՄ և Ֆլեշ ընկերության  սեփականատեր Բարսեղ Բեգլարյանի կապի մասին: Որքանո՞վ է դա համապատասխանում իրականությանը:

 

Ես «Բարեպաշտ Սերունդ» հիմնադրամի տնօրենն եմ, որի  հիմնադիրը Բարսեղ Բեգլարյանն է: Սա բարեգործական կազմակերպություն  է, որն աջակցում է պետական բուհերի լավ սովորող ուսանողներին: Ես նաև ՀԺԱՄ-ի նախագահն եմ: Կապն այսքանով սահմանափակվում է:

 

Իսկ ՀԺԱՄ և «Հանուն հայության հարատևման» շարժման կապի մասին ի՞նչ կասեք:

 

Արդեն 3 տարի է, ինչ այս շարժումը գործում է: Նրա նպատակը հայ էթնոսին հարատև պահելն է: Դա շատ մեծ ստրատեգիական խնդիր է: Ցանկացած հայ մարդ, հայկական կազմակերպություն և նույնիսկ պետությունը կարող է լինել այդ շարժման անդամը: ՀԺԱՄ կուսակցություը որդեգրվել է շարժմանը և ընդունել է նրա գաղափարախոսությունը:

Առաջիկայում ի՞նչ քաղաքական զարգացումներ եք կանխատեսում:

 

Այսօր երևացող 2 ճարտարապետ կա` Լևոն Տեր-Պետրոսյանը և Սերժ Սարգսյանը: Նրանք  ուզում են քաղաքական խճանկար գծել, սակայն 2-ն էլ  սխալվում են, կան այլ ճարտարապետներ ևս, ովքեր հիմա ակնհայտ չեն գործում: Արդեն ուշ աշնանը հասարակությունը կտեսնի, որ այդ 2 սուբյեկտը չեն տիրապետում Հայաաստանի քաղաքական վիճակին, քանի որ կտրված են հասարակությունից: Միայն կարող եմ ասել, որ այս անգամ նրանց փողերը չեն գործելու: Հայ հասարակությունը մերժելու է փողային հարաբերությունները: Իհարկե մի ընչազուրկ զանգված կգտնվի, որ կվերցնի այդ փողերը, բայց գլոբալ առոմով գնալու է տնտեսական և նույնիսկ վարչական լծակների մերժման  քաղաքական գործընթաց: Այսօր իշխող վարչակազմի, այդ թվում` Սերժ Սարգսյանի մոտ քաղաքական կամք չկա: Մի բան եմ տեսնում, որ Սերժ Սարգսյանը ցանկանում է նույնությամբ վերարտադրել խորհրդարանը: Այսինքն` առաջին տեղում լինի Հանրապետականը, երկրորդում` Բարգավաճ Հայաստանը, Օրինաց երկրին կանցկացնեն երրորդ տեղով, ՀԱԿ-ի հետ բանակցում են, նրան էլ կբերեն, դաշնականերին չեն կարող չբերել, քանի որ պետք  է դրսից  ցեղասպանության ճանաչման հարցում աջակցություն ստանան: Վերջ, այսքանով  խորհրդարանը կփակվի: Այս անգամ նման բան չի լինելու

 

Կարելի՞ է ենթադրել, որ ՀԺԱՄ-ն է լինելու  նոր ճարտարապետներից մեկը:

 

Այո, եթե մեր սկսած գործընթացները հասնեն իրենց տրամաբանական ավարտին,  ՀԺԱՄ-ը վերափոխված կներկայանա առաջիկա ըտրություններին, եթե ոչ, ՀԺԱՄ-ը ինքնուրույն, էլի վերափոխված կներկայանա:

 

Հայաստանը նշում է իր անկախությանհ 20-ամյակը: Ի՞նչ կցանկանայիք ասել մեր ժողովրդին:

 

Մենք ունենք արժանապատիվ պետություն: Քաղաքացին դեռ արժանապատիվ չի զգում այդ պետությունը, բայց  պետական համակարգն իր կառույցներով արժանապատվորեն ձևավորված է:  Այս առիթով շնորհավորում եմ մեր ժողովրդին: Իր բոլոր բացթողումներով հանդերձ ունենք կայուն բանակ, որը մեր անվտանգության երաշխավորն է: Կեցցե՜ մեր նախագահը, որ շատ մեծ միջոցառում է կազմակերպել 20-ամյակի կապակցությամբ: Հոբելյանական թվերը պետք է լավ նշվեն, քանի որ դա ոգեշնչում է ժողովրդին: Շնորհավորում եմ բոլորին ՀՀ անկախության 20-ամյակի կապակցությամբ: Սա շատ լուրջ ձեռքբերում է:

 

                                        Հարցազրույցը վարեց` 

 Ամալյա Հովհաննիսյանը