Վահան Հովհաննիսյանը խոստովանել է, որ 1995-ին իր ձերբակալման հրամանը տվել է Սերժ Սարգսյանը

Հունիս 06, 2011 | 13:31

ՀՅ Դաշնակցություն խմբակցության ղեկավար Վահան Հովհաննիսյանը հունիսի 6-ին խոստովանել է, որ իրեն դավաճանել է հիշողությունը, երբ «Սիվիլիթաս» հիմնադրամում հայտարարել է, թե 1995թ. «31»-ի գործով իրեն ձերբակալելու հրամանը տվել է Ազգային անվտանգության պետական վարչության ղեկավար Դավիթ Շահնազարյանը, թեեւ իրականում հրամանը տվել էր ԱԱ եւ ՆԳ նախարար Սերժ Սարգսյանը:

«Ես ներողություն եմ խնդրում, շփոթվել եմ, թե ով եւ երբ է մեր կալանքի վերաբերյալ հրաման տվել, բայց անցել է արդեն 20 տարի… իսկ ով է կոնկրետ հրաման տվել իմ կալանքի վերաբերյալ, Դավիթ Շահնազարյանը, թե Սերժ Սարգսյանը… Այդ կապակցությամբ պետք է հիշեցնեմ հայտնի ռուսական ասացվածքը- хрен редьки не слаще: Գլխավորը, որ ձերբակալությունների մասին հրամանները բխում էին Հայաստանի առաջին նախագահ Լեւոն Տեր-Պետրոսյանից, իսկ Շահնազարյանը եւ Սարգսյանն ի պաշտոնե կատարում էին նրա հրամանները»:

Նշենք, որ Վահան Հովհաննիսյանի հայտարարությունից հետո Դավիթ Շահնազարյանը ասուլիսում հայտարարել էր, թե իր ձերբակալած դաշնակցականներն առ այսօր բանտերում են, իսկ Վահան Հովհաննիսյանին եւ մյուս պատգամավորներին ձերբակալել է Սերժ Սարգսյանը: «Թող դաշնակցականներն իրենց հարցերը պարզեն Սերժ Սարգսյանի հետ»,- ասել էր Շահնազարյանը` միաժամանակ նկատելով, որ ՀՅԴ-ն մոռացել է իր պատմությունն ու 2008-ին ընդգրկվել կոալիցիայի կազմում: