Առաջին կոլտնտեսությունը Հայաստանում` Շիրակի մարզի Բերդաշեն համայնքում

Ապրիլ 21, 2011 | 00:16
Հայաստանում ապրիլի 20-ին հիմնվել է առաջին գյուղացիական կոոպերատիվ տնտեսությունը` նախկին կոլտնտեսությունների տրամաբանությամբ: Այն հիմնվել է Շիրակի մարզի Ամասիայի շրջանի ամենահեռավոր ծայրամասային գյուղում`Բերդաշենում` Հայաստանի վարչապետ Տիգրան Սարգսյանի մասնակցությամբ:

«Սա նոր փորձնական ծրագիր է, որն իրականացվում է Համաշխարհային բանկի վարկային ծրագրով եւ գյուղացիների համաֆինանսավորմամբ: Եթե պիլոտային ծրագիրը հաջողությամբ իրականացվի հանրապետության հարյուր գյուղերում նման կոոպերատիվներ  կհիմնենք, որպեսզի հաղթահարենք սոցիալ տնտեսական ճգնաժամը եւ կանխենք արտագաղթը գյուղերից»,-հայտարարել է վարչապետ Տիգրան Սարգսյանը Բերդաշենում`համայնքի բնակիչների հետ հանդիպման ժամանակ:

«Ծրագիրը կոչվում է գյուղացիական ռեսուրսների կառավարման եւ մրցունակության ապահովման ծրագիր: Իրականացնում է գյուղանախարարությունը համաշխարհային բանկի ֆինանսավորմամբ»,-ներկայացրել է ՀՀ գյուղնախարար Սերգո Կարապետիանը:

Ստեղծվելու են նոր արոտավայրեր, ջրարբեցման եղանակով զարգացնելու են հողագործությունը, գնվելու է գյուղտեխնիկա, հիմնվելու է սպանդանոց,  անասունների նոր լաբորատորիա, որտեղ հնարավոր է  նոր ցեղատեսակներ ստանալ: Եւ գլխավորը` այս ամենը լինելու է համայնքային,  կոլեկտիվ սեփականություն, եւ համայնքը 50 տոկոսի չափով ֆինանսավորում է իրականացնելու:

Վարչապետ Տիգրան Սարգսյանը հայտարարել է, որ այսկերպ հնարավոր կլինի Շիրակի մարզի հեռավոր` Բերդաշենում 20 տոկոսի տնտեսական աճ ապահովել: «Մեկ տարվա 20 տոկոս, 45 միլիոն դրամ , պատկերացնում եք`դա ինչ է նշանակում: Այդքան եկամուտ կարող եք ունենալ, հետո 2 տրակտոր չեք ունենա , կունենաք 4-ը , կունենաք կաթի մթերման կայան: Հասկացեք սա պիլոտային ծրագիր է, Բերդաշենում առաջին փորձն ենք անում: Եթե հաջողությամբ իրականացվի փորձը էլի կիրառելու ենք»,-հայտարարել է Տիգրան Սարգսյանը:

Վարչապետն այցելել է նաեւ Արփի լճի տարածք, որտեղ Գերմանիայի կառավարության եւ պետական բյուջեի համաֆինանսավորմամբ կառուցվում է Ազգային պարկ: Արդեն 4 տարի այս ծրագիրը գոյություն ունի,2010թ-ի ընթացքում արդեն 700 հզար եւրոյի չափով ներդրում է իրականացրել Գերմանիայի կառավարությունը, իսկ 2011 թ-ի համար նախատեսված գումարը մոտավոր հաշվարկներով կազմում է1,5 միլիոն եվրո: Արփի լճի հարեւանությամբ կառուցվել է հյուրատուն, ընթացքի մեջ է նաեւ Ազգային պարկի գրասենյակի շինարարությունը:  Այս ծրագրով նախատեսվում է զարգացնել էկոտուրիզմը Հայաստանում:
Լուրեր Հայաստանից – NEWS.am

0Share

Տպել