ԱՄՆ նախկին կոնգրեսական Քուրթ Ուելդոնը մեկնել է Լիբիա՝ Մուամար Կադաֆիի հետ բանակցություններ վարելու համար։
Ինչպես հաղորդում է The New York Times թերթը, Ուելդոնին բանակցությունների է հրավիրել Կադաֆիի շտաբի պետը։ Ամերիկյան բանագնացը խոսքում նշել է, որ իր այցը մասնավոր բնույթ է կրում։ Այնուամենայնիվ դրա մասին տեղյակ են նաև նախագահ Բարաք Օբաման և Կոնգրեսի անդամները։

Անմիջապես վայրէջքից հետո բանագնացը պատրաստվում էր հանդիպել անձամբ Կադաֆիի հետ՝ նրան համոզելու դադարեցնել դիմադրությունը։ Հանդիպումը պետք է տեղի ունենար ապրիլի 5-ին, սակայն առայժմ դրա արդյունքների մասին չի հաղորդվում։

«Ես շատ լավ եմ ճանաչում Կադաֆիին և կարող եմ վստահեցնել, որ միայն ռմբակոծությամբ ստիպել Կադաֆիին հանձնվել, հնարավոր չէ»,- մեկնաբանել է Ուելդոնն իր այցը։ Նրա կարծիքով՝ միջազգային հանրությունը Վաշինգտոնի գլխավորությամբ պետք է խնդրի լուծումը տեղափոխի քաղաքական դաշտ, քանի դեռ ուշ չէ։ Բանակցություննների մեջ պետք է ներգրավել Կադաֆիի որդուն՝ Սեյֆ ալ Իսլամին, և երկխոսության պատրաստ այլ ազդեցիկ պետական գործիչների։

Այսօր Լիբիայի հետ բանակցությւոններ սկսելու կոչ է արել նաև Ֆրանսիայի ԱԳ նախարար Ալեն Ժյուպեն։ Նա նշել է, որ ՆԱՏՕ-ի ռազմական գործողությունները կարող են «խճճվել» Լիբիայում, ուստի անհրաժշտ է անհապաղ անցնել բանակցությունների՝ ՄԱԿ-ի, ապստամբների և գործող իշխանությունների ներկայացուցիչների (առանց Կադաֆիի) մասնակցությամբ։