«Հայկական ժամանակ». Ախթալան մասնատվել է

«Ախթալայի լեռնահարստացուցիչ կոմբինատի» տնօրինությունը Ախթալայում նախաձեռնել է ստորագրահավաք՝ նույն գործարանի սեփականատեր, մանկապղծության մեղադրանքով կալանավորված Սերոբ Տեր-Պողոսյանին ազատելու խնդրանքով։ Արդյունքում քաղաքը երկու մասի է բաժանվել, գործարանում աշխատող կամ այլ կերպ ասած՝ Սերոբ Տեր-Պողոսյանից սոցիալական կախում ունեցողները գտնում են, որ իրավապահները նրան պետք է ազատ արձակեն, քանի որ մտավախություն ունեն, որ նրան դատապարտելու դեպքում գործարանը կարող է փակվել, և իրենք կզրկվեն աշխատանքից։ Իսկ մյուս մասն ամաչում է այս պատմության մասին անգամ խոսել, քանի որ տեղի ունեցածը ի ցույց է դնում քաղաքում առկա այլասերված մթնոլորտը։ Ի վերջո, Ախթալայում բոլորն իրար ճանաչում են և գիտեն, որ Սերոբ Տեր-Պողոսյանի զոհերից շատերին նրա տուն ուղեկցել են այդ տղաների ծնողները, որոնք էլ ի պաշտպանություն նրա ստորագրահավաք կազմակերպելու հիմնական հեղինակներն են։