**

ԳԱՐՈՒՆՆ ԱՓԵՐԻՍ ՄԵՋ ԱՌԱԾ…

Գարունն ափերիս մեջ առած,
Գալիս եմ դեպի քեզ, ի՛մ սեր,
Ուզում եմ կյանքն իմ մնացած,
Ապրել երջանի՛կ, ՔԵԶ հետ:

Կյանքս դատարկ է առանց քեզ,
Ապրածս նման է չապրածի,
Ի՞նչ է իմ կյանքն առանց սեր,
Նո՛ւյնն է, թե քայլեմ անուղի…

Գարունը շուրթերիս առած,
Երգում եմ քո մասին, ի՛մ սեր,
Որ բոլոր լույսերը մարած,
Գաս ու քո սիրո՛վ վառես:

Ապրում եմ քո մասին տենչալով,
Գարունը հույսիս շող դարձրած,
Սպասում եմ սրտի՜ թրթիռով,
Գարո՜ւնն ափերիս մեջ առած…

**

ԳԺՎՈՒՄ ԵՄ…

Գժվում եմ…

Իմ կյանքում քո բացակայությունից,
Գժվում եմ…

Քո անհասկանալի,
Անբացատրելի անգոյությունից
Գժվում եմ…

Գժվում եմ քո լռությունից,
Քո հեռավորությունից,
Քո անտարբերությունից,
Գժվում եմ,
Որ չես գալիս,
Որ հնարավորություն չես տալիս
Քեզ նվիրելու
Սրտումս կուտակված ողջ սերը,
Չես գալիս, որ քեզ նվիրեմ
Սրտիս արևը…

Գժվում եմ սրտիս կիսատությունից,
Կյանքիս անգույն լինելուց,
Գժվում եմ, որ գիտեմ կաս,
Բայց և կողքիս չես.
Ո՞ւր ես,
Որքա՞ն մոտ կամ հեռու ես…
Մի՛ թող որ գժվեմ…

Արև Բալդրյան /ԱՐԵԳԱԿ/

**