ԼՐԱՀՈՍ - Հեղինակ՝ Admin. Tuesday, June 4, 2013 5:49 - չքննարկված
Գործարարությամբ ամենա աչքի ընկնող կառույցը
«Հրապարակը» գրում է. «Թվում է՝ եկեղեցին պետք է կարիքավորներին, սոցիալապես անապահովներին ձեռք մեկնի, բայց մեր եկեղեցին ոչնչով չի տարբերվում ժողովրդին հարստահարող աշխարհիկ իշխանությունից:
Խմբագրություն դիմած քաղաքացին «Այրարատ» կինոթատրոնի դիմացի մայթին՝ եկեղեցու մոտ, տարիներ շարունակ առեւտուր է անում: Այստեղ ամեն ինչ կա՝ ծաղիկ, շահումով խաղեր, բջջայինների լիցքավորման քարտեր, զովացուցիչ ջրեր: Երբ Սբ. Գրիգոր Լուսավորիչ եկեղեցին սկսեց գործել, այստեղ սկսեցին տեր ու տնօրինություն անել հոգեւորականները: Մեզ այցելած անձը պատմեց, որ եկեղեցու հոգեւոր հովվի վարորդը կամ օգնականն է հիմա «տարածքը նայում»՝ Գեւորգ անունով: Նա շրջում է տարածքում եւ գանձում իր «հասանելիքը»:
Բացատրությունն այն է, որ սա եկեղեցու տարածքն է, եւ այստեղ առեւտուր անողները կամ պետք է մուծվեն, կամ հեռանան: Վճարման գնացուցակը տարբեր է՝ կախված զբաղեցրած մետրերից, առեւտրի տեսակից եւ օրացույցից: Ասենք՝ տոն օրերին ծաղիկ կամ մոմ վաճառողների «հարկը» բարձրանում է՝ ենթադրում են, որ եկամուտն այդ օրերին ավելին է, քան սովորական օրերին: Այնպես որ, գումարը կազմում է 500-5000 դրամ:
Երբեմն Գեւորգի հետ շրջագայության է դուրս գալիս նաեւ հովիվը, որպեսզի առեւտրականները տեսնեն, որ նա ինքնագլուխ չէ, որ գանձած գումարները գնում են եկեղեցու «կարիքներին»: Մենք հետաքրքրվեցինք՝ չե՞ք փորձել հրաժարվել այդ անօրինական գումարները վճարելուց: «Դե, իրենց տարածքն է՝ կհանեն, ստիպված վճարում ենք: Բայց համ ոստիկանին ենք վճարում, համ քաղաքապետարանին, սա էլ որ գումարվում է՝ տակը բան չի մնում»,- եղավ պատասխանը»: