Վ.Գասպարյանի վերջնագիրը. «Կամ էս կլանները խելքները գլուխները կհավաքեն, կամ չեն ապրի հասարակության մեջ» ՏԵՍԱՆՅՈՒԹ

Եվ չենք հանդուրժելու, ոստիկանությունը այլևս չի հանդուրժելու»,- այսօր Գյումրի կատարած այցելության ժամանակ հայտարարեց ՀՀ ոստիկանապետ Վ. Գասպարյանը՝ անդրադառնալով ապրիլի 23-ի Գյումրիի կրակոցներին:

«Էստեղ Գյումրիում ունենք երկու, չեմ վախենում օգտագործել, կլան, որոնք, չգիտեմ ինչու, շատ երկար տարիներ արյունահեղություններով, զոռբայություններով, ջարդուփշուր անելով՝ իրենցն են թելադրել, բայց չի լինի, այլևս ավարտվեց այդ դարաշրջանը:

Զոռբայություն ՀՀ-ում չի լինելու:

Բոլոր նրանք, ովքեր փորձելու են զենքով, զոռբայությամբ, անօրինականությամբ ինքնահաստատվել, կհայտնվեն այնտեղ, որտեղ գնում են մարդիկ, որ զենքով և արյունով են լուծում խնդիրները»:

Վ. Գասպարյանը ևս մեկ անգամ անդրադարձավ այն մեկնաբանությանը, թե ինչու է ասել, որ գյումրեցիք գողական մտածելակերպ ունեն.

«Էլի անդրադառնամ էդ գողական մտածելակերպին: Այս դեպքի հիմքում ընկած է մետաղաձողով գլխին հարվածելը: Մարդը գալիս հայտարարություն է տալիս՝ սառույցն ընկել է իմ գլխին: Մարդիկ չեն խոսում: Ոստիկանությունն էլ նախկինը չէ: Կարող են խոսել, եթե հին մեթոդներով լինի: Բայց էդ ժամանակ էլ պիտի ասեն՝ տարան ծեծեցին: Ես դեմ եմ ծեծին, որովհետև այդտեղ դու ավելի ցածրանում ես, քան թե հանցագործություն կատարողը, որովհետև դու ցույց ես տալիս, որ դու պրոֆեսիոնալ չես, այլ մսագործ ես»:

Վ. Գասպարյանն ասաց, որ հասնելու է նրան, որ Գյումրիում բոլորը հանգիստ շնչեն և փոխվի բարոյահոգեբանական մթնոլորտը:

«Կամ էս երկու կլանները խելքները գլուխները կհավաքեն, կապրեն հասարակությանը համահունչ, կամ չեն ապրի հասարակության մեջ. կապրեն այնտեղ, որտեղ պետք է հայտնվեն:

Սա վերջնական է:

Եվ կա բոլոր հնարավորություններն ու վճռականությունը»:

ԳԱԼԱ-ի այն հարցին, թե ինչպես է գնահատում ոստիկանների աշխատանքը, երբ կրակոցները հնչել են Ոստիկանության Գյումրու բաժնից քիչ հեռու, և ոստիկանները հասել են միայն սպանությունից հետո, Վ. Գասպարյանը պատասխանեց.

«Նման որոշում կայացնող մարդիկ երկու ձևով են անում՝ կամ կանխամտածված, պլանավորված ձևով են անում, կամ հետապնդում և հարմար առիթ են գտնում: Ես կարծում եմ՝ այս դեպքը այն է, որ հետապնդել և հարմար առիթ է գտնվել:

Էս դեպքում՝ 500 մետր, 400 մետր, կապ չունի: Ոստիկանության շենքը չի գնում դեպի վայր, ոստիկանության շենքը չի գնում հանցագործության բացահայտմամբ, այլ՝ ոստիկանները: Կրակոցները. ձեր համար նորությո՞ւն է, որ Գյումրիում կրակոցներ կան:

Ցավոք սրտի՝ ոչ:

Ես զարմացած եմ, թվում է, թե էդ զոռբայության ժամանակը պետք է անցած լիներ: Բայց պարզվում է՝ մարդիկ շատ պինդ բռնվում են իրենց անցյալից, որ կարող են ոչինչ չանել և ուրիշին զենքով թելադրելով՝ իրենց կեցությունը ապահովեն:

Չի՛ լինի այդպես, չի՛ լինի:

Մենք ապահով երկիր ենք սարքելու:

Ներքին ապահովության պատասխանատուն այս երկրի ես եմ և չեմ հանդուրժի»:

Գալով այն հարցին, թե հնարավո՞ր է կրակոցները շարունակություն ունենան, ՀՀ ոստիկանապետը ասաց. «Ես համոզմունք ունեմ, որ նման դեպքերը շարունակություն են ունենում, երբ մենք չենք կանխում ի սկզբանե և չենք աշխատում: Նման պրակտիկան էլ չի աշխատելու: Բոլոր նրանք, ովքեր, էսպես ասած, թիմ են կազմում այս կամ այն կլանի, նրանք բոլորը մեր կողմից լինելու են հսկողության տակ: Ես գիտեմ, որ նրանց մեջ կան թմրանյութեր օգտագործողներ: Դրանց բոլորին հավաքելու և ստուգելու ենք…

Ես խորհուրդ եմ տալիս բոլոր նրանց հաշտվել, որ նրանց օրերը հաշված է:

Ովքեր կասկածանքով են մտածում, կապրենք՝ կտեսնենք: Իսկ նրանց՝ այն երևույթներին, որ նույն ձևով են շարունակելու, խորհուրդ եմ տալիս, թե արտագաղթը նրանց համար կլինի, և այդ արտագաղթը ես կկազմակերպեմ նրանց համար»:

Նյութի աղբյուրը ԳԱԼԱ-ի: