Մոսկվայի նորակառույց եկեղեցում ոգեկոչել են Հայոց ցեղասպանության զոհերի հիշատակը

14:27, 24 Ապրիլ, 2013

ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Հայոց ցեղասպանության 98-րդ տարելիցի կապակցությամբ Մոսկվայում միջոցառումներ են անցկացվել: Ինչպես «Արմենպրես»-ին տեղեկացրին Նոր Նախիջևանի և Ռուսաստանի հայոց թեմի մամուլի ծառայությունից,  Մասկվայի նորակառույց եկեղեցական համալիրում հավաքվել էին հազարավոր հայեր` իրենց  հարգանքի տուրքը մատուցելու ցեղասպանության զոհերի հիշատակին:

Եկեղեցու բակում տեղադրված  պատմական խաչքարի մոտ ծաղկեպսակներ զետեղելուց հետո, Նոր Նախիջևանի և Ռուսաստանի Հայոց թեմի առաջնորդ Տեր Եզրաս եպիսկոպոս Ներսիսյանի հանդիսապետությամբ և հոգևոր դասի մասնակցությամբ  տեղի է ունեցել հոգեհանգստյան արարողություն, որի ավարտին Սրբազան հայրը կարդացել է Ամենայն Հայոց կաթողիկոս Գարեգին Բ-ի և Մեծի Տանն Կիլիկիո Արամ Ա կաթողիկոսի համատեղ հայտարարությունը, որով Թուրքիայից պահանջվում է վերադարձնել բռնագրվված հայկական եկեղեցիները և եկեղեցապատկան տարածքները:

Հոգեհանգստյան արարողությանը ներկա են եղել ՌԴ-ում ՀՀ  արտակարգ և լիազոր դեսպան Օլեգ Եսայանը, Ռուսաստանի հայերի միության նախագահ Արա Աբրահամյանը, ՀԱԵ Գերագույն հոգևոր խորհրդի անդամ Ռուբեն Վարդանյանը, ՌԴ-ում ԼՂՀ ներկայացուցիչ Ալբերտ Անդրյանը, մի շարք քաղաքական, հասարակական, կրթական կազմակերպությունների ներկայացուցիչներ, եկեղեցու բարերարներ,  Մոսկվայի «Հայորդյաց տան« ուսուցիչներ, սաներ, «ՆՈՒՌ» եկեղեցասեր երիտասարդաց միության անդամներ: