ՀՀ ոստիկանության Էրեբունու բաժինը պարզել է թիվ 09/02 ընտրատեղամասում այլ անձի՝ ՀՀ նախագահի աշխատակազմի ղեկավար Վիգեն Սարգսյանի անձնագրով քվեարկելու փորձ կատարած քաղաքացու ինքնությունը և նրան 2013թ. փետրվարի 27-ին ներկայացրել նախաքննության մարմնին։ Ինչպես տեղեկացնում են ՀՀ գլխավոր դատախազության մամուլի ծառայությունից, նախաքննության ընթացքում պարզվել է, որ 2013թ. փետրվարի 18-ին` ժամը 10:45-ին, անհայտ անձը փորձել էր 09/02 ընտրատեղամասում քվեարկել ուրիշի` Վիգեն Սարգսյանի անձնագրով, ինչը, սակայն, չէր կարողացել ավարտին հասցնել իր կամքից անկախ պատճառով, քանի որ ընտրական հանձնաժողովի անդամները հայտնաբերել էին խախտումը և կանխել: Քաղաքացին ընտրատեղամասից դիմել էր փախուստի:

Հիշեցնենք, որ թիվ 09/02 ընտրատեղամասի ընտրական հանձնաժողովի նախագահ Զ. Միրիջանյանի հաղորդման հիման վրա նախապատրաստված նյութերով հարուցվել էր քրեական գործ` ՀՀ քրեական օրենսգրքի 34-153-րդ հոդվածով:Էրեբունի և Նուբարաշեն վարչական շրջանների դատախազը փետրվարի 26-ին գրավոր հանձնարարել էր Էրեբունու ոստիկանության բաժնին ակտիվացնել ուրիշի անձնագրով քվեարկելու փորձ կատարած անձի ինքնությունը պարզելու աշխատանքները և նրան ներկայացնել քննությանը՝ արձանագրելով, որ գործին կցված է նաև միջադեպի վերաբերյալ տեսագրությունը։

Ձեռնարկված միջոցառումների արդյունքում ոստիկանությունը պարզել է, որ ՀՀ նախագահի աշխատակազմի ղեկավար Վիգեն Սարգսյանի անձնագրով թիվ 09/02 ընտրատեղամասում քվեարկելու փորձ է կատարել Երևանի բնակիչ Հրանտ Գլջյանը և նրան ներկայացրել է քննչական մարմնին։

Ձեռբ բերված ապացույցների հիման վրա Հ.Գլջյանին մեղադրանք է առաջադրվել ՀՀ քրեական օրենսգրքի 34-153-րդ հոդվածի 1-ին մասով։

Նախաքննությունը շարունակվում է։

Գլխավոր դատախազությունից ծանուցում են, որ հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: