Այսօր ՀԱԿ դաշինք, որպես այդպիսին, այլևս գոյություն չունի, չկա, մեկ տարի առաջ էր սկսվել քայքայման պրոցեսը, բոլոր հեռացածներն ունեն իրենց պատճառաբանությունները, ՀՀՇ արտահերթ համագումարին իր ելույթում ասաց ՀՀ Լևոն Տեր-Պետրոսյանը, հարցեց` ի՞նչ անել: Նրա խոսքով, ՀՀՇ-ն ունեցել է փառավոր ժամանակներ, ունեցել է նաև խայտառակ ժամանակաշրջան: Նրա կարծիքով, ՀՀՇ-ն Վանո Սիրադեղյանի նախագահությունից դուրս գալուց հետո դարձել էր լավագույն դեպքում մի գեղական «կլուբ», եթե չասենք աղանդ: 

«Ի՞նչ քաղաքական գործություն էր ծավալել այս կուսակցությունը մինչև 2007 թվականը, ես համարում եմ ՀՀՇ-ի պատմության ամենախայտառակ շրջանը. իմիտացիա արեց, պարբերական համագումարներ, ճառեր, կենացներ, անցյալի հիշողություններով հպարտացողներ, մասնակցեց ընտրությունների, ունեցավ խայտառակագույն արդյունքներ, և հիմա եթե Կոնգրես չկա, մենք հայտնվում ենք 2000-2007 թթ. վիճակում, սա՞ է մեր ցանկացածը»,- ասաց նա։ 

«Ես չեմ ուզում, որ ՀՀՇ-ն կերակրի միայն թանգարանի, այդպիսի կուսակցություններ արդեն կան»,- ասաց Լևոն Տեր-Պետրոսյանը։ 

Լևոն Տեր-Պետրոսյանը ջրով խմեց ՀՀՇ կենացը, ապա շարունակեց ասելով՝ թող չդիտվի, որ փոքր մի նախաձեռնող խումբ հավասար իրավունքներով միանում է մի շատ մեծ բանի, մնացածների հետ բոլորը չեն կարող մտնել այս կուսակցություն, գալու է 1000 մարդ, ով նոր ավյուն է բերելու: 

«ՀՀՇ-ի անդամների 95%-ը ավելի մեծահասակ է, քան հիսուն տարեկանը: Բիձեքով, այս քյաչալված մազերով պիտի ազգ պահե՞նք: Փառք Աստծո, որ երիտասարդների ռեզերվը կա, այլապես մեզ վիճակվելու էր մեր պատմական կուսակցությունների բախտը, մեր թոռներին էինք պատմելու, մեզ դրանից ի՞նչ»,- ասաց Լևոն Տեր-Պետրոսյանը: 

Նրա խոսքով՝ մի բան էլ իրենք են պարտական երիտասարդներին, որ այս գործի մեջ են մտնում. «Մենք մնում ենք հինգ տարի առաջ ձևափոխված մեր կաշվի մեջ, որևէ նոր բան չի ստեղծվել: Անունը փոխելով, մարդու էությունը փոխվե՞ց: Եթե սա չեղավ, ուրեմն այլընտրանքն անապատ է»,- ասաց Լևոն Տեր-Պետրոսյանը: 

Ի դեպ, ՀՀՇ-ն քվեարկեց ՀԱԿ կուսակցության միանալու օգտին. ավելի քան 400 ներկաներից 375-ը կողմ էր, 6-ը՝ դեմ, 3-ը՝ ձեռնպահ: Սակայն հայտարարվել էր, թե համագումարին հրավիրված է եղել 700-ից ավելի պատվիրակ: