Առաջիկա նախագահական ընտրություններում ՀՀ նախագահ, ՀՀԿ առաջնորդ Սերժ Սարգսյանի նախընտրական շտաբը կղեկավարի ԱԺ նախագահ, կուսակցության փոխնախագահ Հովիկ Աբրահամյանը: Այս մասին որոշումը կայացվել է նոյեմբերի 2-ի երեկոյան կայացած ՀՀԿ գործադիր մարմնի նիստում:Նիստի ավարտին ՀՀԿ խոսնակ, ԱԺ փոխնախագահ Էդուարդ Շարմազանովը լրագրողներին հայտնել է, որ քննարկվել են նաև ներկուսակցական և դեկտեմբերի 15-ին կայանալիք ՀՀԿ համագումարին առնչվող հարցեր: 

Հիշեցնենք, որ նիստից ժամեր առաջ կայացած ասուլիսում` ի պատասխան լրագրողների հարցերի, ԱԺ նախագահը վերահաստատել էր, որ դեկտեմբերի 15-ին գումարվելիք ՀՀԿ համագումարում կուսակցությունը կընդունի առաջիկա նախագահական ընտրություններում ՀՀ գործող նախագահ, կուսակցության ղեկավար Սերժ Սարգսյանի թեկնածությունն առաջադրելու մասին որոշում: Նա նաև չէր բացառել, որ ինքը կղեկավարի Ս.Սարգսյանի նախընտրական շտաբը` հաշվի առնելով իր «մեծ փորձն այդ ուղղությամբ», սակայն նշել էր նաև, որ կուսակցությունը նման հարց դեռևս չի քննարկել:

Նախագահական ընտրությունների օրը պաշտոնապես դեռևս հրապարակված չէ: Ընտրական օրենսգրքի համաձայն` ՀՀ նախագահի ընտրությունն անցկացվում է գործող նախագահի լիազորությունների ավարտից հիսուն օր առաջ: Ընտրության օրվա մասին Կենտրոնական ընտրական հանձնաժողովի նախագահը հանրային ռադիոյով և հանրային հեռուստատեսությամբ հաղորդագրությամբ հանդես է գալիս քվեարկության օրվանից ոչ ուշ, քան 70 օր առաջ: Նախագահի ընտրության ժամանակ քվեարկության օրը հայտարարվում է ոչ աշխատանքային օր: