ARMENIA - Հեղինակ՝ Admin. Ուրբաթ, Դեկտեմբերի 4, 2009 19:50 - 4 քննարկում

ԱՅՍՈՒՀԵՏ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԿԱՐԵԼԻ Է ՀԱՅՈՑ ՑԵՂԱՍՊԱՆՈՒԹՅՈՒՆԸ ՈՒՐԱՆԱԼ ԵՎ ՄՆԱԼ ԱՆՊԱՏԻԺ

Ուրբաթ, 2009թ. դեկտեմբերի 4-ի ժամը 16:00-ին Երևանի Կենտրոն-Նորք-Մարաշ վարչական շրջանների առաջին ատյանի դատարանում (դատավոր` Կարինե Պետրոսյան) շարունակվեց «Արարատ» ՌԿ դատական հայցը «Կովկասի ինստիտուտ» հիմնադրամի դեմ` Հայոց ցեղասպանությունը կասկածի տակ առնող և ուրացող հրապարակումների համար: Դատական վարույթն սկսվել էր երեկ և մինչև այսօրվա հիշյալ ժամն ընդմիջվել, որպեսզի դատավորը դատական ակտի տեսքով գրավոր կերպով հայտնի իր կարծիքը տվյալ հայցը կարճելու`պատասխանող կողմի միջնորդության մասին։

Նիստը կայացավ նույն վայրում` դատարանի` Քանաքեռ-Զեյթուն վարչական շրջանում գտնվող շենքի թիվ 10 դահլիճում: Նիստն սկսելու պահին ներկա էր շուրջ 20 հոգի, առավելաբար զանգվածային լրատվության միջոցների ներկայացուցիչներ, մի քանի մտավորականներ և ուսանողներ, ջախջախիչ մեծամասնությամբ` հայցորդի կողմնակիցներ: Այսօր բացակայում էին երեկվա նիստին ներկա լինելու «համարձակությունն» ունեցած երկու հեռուստաընկերությունների լրագրողները: Փակագիծ բացելով նշենք, թե այս դատին առհասարակ ներկա չգտնվեց ՀՅԴ «Երկիր-մեդիա» հեռուստաընկերությունը. սա էլ ի գիտություն Հայ դատի նախանձախնդիր (??!!) ՀՅԴ-ի` ՀՀ ղեկավարության պարտվողական քայլերից իսկապե´ս տագնապող անդամների ու համակիրների…

Այսօրվա նիստին, երեկվա նիստի նման, ներկա էին հայցորդի ներկայացուցիչները` «Արարատ» ՌԿ տնօրեն Արմեն Այվազյանը և փաստաբան Արթուր Գրիգորյանը և պատասխանող կողմի ներկայացուցիչ Վահագն Գրիգորյանը: Վերջինս, երեկվա նման, իրեն շատ հանգիստ էր զգում դատարանի դահլիճում: Հայտնապես, նրան հե´նց սկզբից հայտնի էր դատական գործընթացի արդյունքը: Չէ՞ որ իր «շեֆը»` ՀՀ-Թուրքիա իշխանությունների սիրաբանության հակահայկական գործընթացի աշխուժացման հետ բավականին աշխուժացած և ՀՀ հեռուստաընկերությունների ամենաշատ հյուրընկալած «աստղերից» մեկի վերածված ալեքսանդր իսկանդարյանը (սրա անունը գրում եմ հայոց այբուբենի փոքրատառերով, քանի որ, ի շարս հայկական այլ արժեքների, նա հետևողականորեն անարգում է հայոց լեզուն, թեև ավելի ճիշտ կլիներ գրել թուրքերենով` Iskender Iskenderoglu ձևով) մի հեռուստաելույթի ժամանակ շատ ինքնավստահ կերպով հայտարարել էր, թե դատը ընդամենը հինգ րոպե է տևելու…

Մեր օրերի այս Նոստրադամուսը մի փոքր սխալվեց` եթե նկատի ունենանք այսօրվա նիստը միայն: Նրա կանխագուշակումը իրականացավ… պլանի գերակատարումով: Արդարև, տիկին Կարինե Պետրոսյանը ներկայացավ և անթաքույց անտարբերությամբ հապճեպ ընթերցեց «հանուն Հայաստանի Հանրապետության» իր կայացրած վճիռը` ԿԱՐՃԵԼ ՀԱՅՑԸ: Այս տիկինը վստահաբար չէր հասկանում, թե ի~նչ ահավոր հանցագործություն էր գործում նման վճռի հրապարակումով, այն էլ` «ՀՀ անունից»: Ընթերցումը տևեց ընդամենը 1 րոպե 15 վայրկյան, որով ալեքսանդր իսկանդարյանը քառապատիկ սխալած դուրս եկավ իր կանխագուշակման ժամանակի հարցում…

Արձանագրած «հաղթանակից» թևեր առած` պատասխանող կողմի ներկայացուցիչ Վահագն Գրիգորյանն այսօր ևս նիստից անմիջապես հետո խույս տվեց լրագրողներից ու անմիջապես հեռացավ դատարանի տարածքից: Մեր ժողովուրդն իզուր չի ստեղծել «Գող` սիրտը դող» իմաստուն ասացվածքը…

Այսպիսով, յամի Տեառն 2009 թուականին, իբրև թե հայկական պետություն հայտարարված Հայաստանի Հանրապետության մայրաքաղաք Երևանի Կենտրոն-Նորք-Մարաշ վարչական շրջանների առաջին ատյանի «դատարանում» «դատավոր» ոմն Կարինե Պետրոսյանի ձեռքով, իրականում`ՀՀ ամենաբարձր իշխանության անմիջական հրահանգով, ՀՀ-ում կատարվեց մի քայլ, որն անհնար էր նույնիսկ ամենավատ երազում երևակայել ընդամենը մեկ-երկու տասնամյակ առաջ:

Այս վճռի չբողոքարկման դեպքում, ՀՀ-ում այսուհետ որևէ արարած, այդ թվում` թուրք թշնամիներ, կարող են Հայոց ցեղասպանության իրողությունը կասկածի տակ առնող կամ ուրացող հրապարակումներ, տեսանյութեր և այլն հրապարակել ու տարածել անպատիժ կերպով` ունենալով ՀՀ իշխանությունների բացահայտ հովանավորությունն ու աջակցությունը:

Մի անգամ ևս շեշտենք, թե կասկածից դուրս է, որ այս խայտառակ դատավճիռը կայացվել է ՀՀ ամենաբարձր իշխանությունների թելադրանքով, որով մի անգամ ևս ապացուցվում է, թե ՀՀ-ում դատական իշխանության անկախություն կոչված հասկացությունը պատկանում է ֆանտաստիկայի բնագավառին:

Մյուս կողմից, ինչպես նիստից հետո իր տված իրավագիտական գնահատականում նշեց հայցորդի փաստաբան Արթուր Գրիգորյանը, նման վճիռ կայացնելով, ՀՀ դատարանը փաստորեն կատարեց ապօրինություն` ՀՀ քաղաքացուն և իրավաբանական անձին զրկելով դատական կարգով իր իրավունքները պաշտպանելու` ՀՀ սահմանադրությամբ, օրենսդրությամբ և ստորագրած միջազգային փաստաթղթերով ամրագրված տարրական իրավունքից:

Ավելորդ չէ հիշեցնել, թե նման խայտառակությունն արձանագրվում է մի իշխանության օրոք, որն իր գաղափարախոսությունը հայտարարել է նժդեհյան ցեղակրոնությունը. սրանից ավելի մեծ անարգանք Նժդեհի հիշատակին` անհնար է երևակայել։

Իսկապես, հարց է ծագում. եթե դատարանը կարճելու էր հայցը, ինչո՞ւ էր դա դատական վարույթ ընդունել: Սա տրամաբանական տարրական մի հարց է, սակայն խնդիրը հենց այն է, որ ՀՀ-ում շատ երևույթներ հեռու են տարրական տրամաբանությունից… ՀՀ-ի իշխանությունների և հասարակության մեծ մասի, այդ թվում իրենք իրենց մտավորական հորջորջողների համար` «ազգային ու մարդկային պատիվ», «ազգային ու մարդկային արժանապատվություն» ու նման հասկացություններ վաղուց հանգրվանել են նմանների հիշողության աղբանոցում…

Այս բոլորը զարմանք չեն հարուցում մի պետության մեջ, որի իշխանությունները, ստորագրելով ՀՀ-Թուրքիա արձանագրությունները` համընդհանուր պատերազմ հայտարարեցին ոչ միայն Հայոց ցեղասպանության հիշատակման ու նրա քաղաքական գնահատականի, այլև առհասարակ հայոց պատմության, այսինքն` մեր ռազմավարական մեծագույն և հզորագույն պաշարներից մեկի` պատմական հիշողության դեմ:

Այս ամբողջ խայտառակությունից հետո, իրավունք չունե՞նք չակերտների մեջ դնելու ոչ միայն տիկին Կարինե Պետրոսյանի դատավորի կոչում-հանգամանքը, այլև նույնինքն ՀՀ-ի` որպես հայության շահերը իբրև թե պաշտպանելու կոչված պետության` որպես այդպիսին (պետություն) լինելը:

ՀՀ դատարանի վճիռը, մեր համոզումով, հե´նց հրապարակման պահից դառնալու է թուրքական, ադրբեջանական և նրանց հովանավոր-գաղափարակից արևմտյան-ռուսական ու այլազգի զանգվածային լրատվամիջոցների գլխավոր լուրերից մեկը: Նրանք և այդ երկրների քաղաքական ղեկավարությունները ինչո՞ւ այդպես չնշեն իրենց արձանագրած հերթական գոլը հայկական խաղադաշտի` դարպասապահից և պաշտպաններից զուրկ դարպասին, այն էլ «հայկական» դատարանի այնպիսի~ ինքնագոլով (սեփական դարպասի գրավում), որն իր հարվածի ուժգնությամբ նաև պատռեց դարպասի ետևի ցանցը և իր թափով սպառնում է նաև խաղի հանդիսականների քիթ-մռութին…

Ամբողջ հայությունը կոչված է համընդհանուր ընդվզելու ՀՀ դատարանի այս ամոթալի, անպատիվ ու զազրելի վճռի դեմ: Դուք և մենք բոլորս ԿՈՉՎԱԾ ԵՆՔ գործո´ն և գործնակա´ն ցասումով ապացուցելու, թե չենք մոռացել Խաչատուր Աբովյանի խոսքը. «Այդ ո՞ւմ դեմ եք սուր բարձրացրել: Հայոց մեծ ազգին դուք չե՞ք ճանաչում>…

Գևորգ Յազըճյան

Պատ.գիտությունների թեկնածու
Ardarutyun.org, 4.12.2009

4 քննարկումներ

You can follow any responses to this entry through the RSS 2.0 feed. You can leave a response, or trackback from your own site.

Արտակ
Dec 4, 2009 20:29

Իմ կարծիքով այս դատական գործը շատ ավելի ընդգրկուն է և ավելի ճիշտ կլինի քննարկվի ՀՀ Ազգաին Ժողովում որպեսզի համապատասխան օրենսդրություն ստեղծվի այսպիսի հանցանքների համար: Կամ միգուցե այս գործ մի անգամից պիտի Սահմանադրական Դատարան ուղղարկվի՞

Իմ կարծիքով որպես դե ֆակտո և անմիջապես կիռարվող պատիժ հանցագործին կարելի է շնորհել “Հայոց Ցեղասպանությունը ժխտողի տիտղոս” և իհարկե սա ամրագրել բոլոր հնարավոր հրապարակումներում որտեղ այս մարդու անունը պիտի նշվի:

Կարդացողի Հավանություն՝ 7 0

Արտակ
Dec 4, 2009 21:22

Քանի որ գրքերը համարվում են մնայուն արժեքներ և կարող են գօրծածական լինել ապագայում իմ կարծիքով հարկ կա քննադատական աշխատություն ստեղծել և ամրակցել այսպիսի գրքերին որպեսզի ապագայում պարզ լինի թե խմբագրի/հեղինակի և թե գրքի արժեորումը: Իսկ եթե հեղինակը կցանկանա պաշտպանական կամ ել մեղայական աշխատություն գրել ապա սա էլ հարկաոր է ամրակցել գրքին:

Կարդացողի Հավանություն՝ 6 0

MAX
Dec 5, 2009 0:41

խայտառակվեցինք ամբողջ աշխարհով մեկ,ես ինչ պիտի ասեմ Ֆրանսիայում ապրող թուրքին եթե նա ժխտի ծեղասպանությունը,ինչով պաշպանվեմ նրա հետ խոսելիս,ուր են միյուսները,ՀՅԴ գլուխը մցրել է ավազի մեջ ինչպես միշտ, երբ ճակատագիրն է որոշվել հայոց,ուր է սփյուրքը,այս հարցին անհապաղ է պետք լուծում տալ և այդ իսքյանդարովին բացի մեծ տուգանքներից,պետք է խայտառակ ձևով վտարել Հայաստանից,ի ցույց աշխարհին.

Կարդացողի Հավանություն՝ 7 0

markarish
Dec 5, 2009 10:12

Հայաստանում դատաիրավական համակարգը գործում է , ընդհանուր իրավական սկզբունքներին հակառակ: Իրավագետների մեծ մասը իրավադոդեր են: Իսկ Դատավորները , բիզնեսմեններ: Վերջերս անձամբ համոզվել եմ: Արմեն Այվազյանը այս հարցում միամիտ է գտնվել: Պետք էր դասական մեթոդով մոտենալ հարցին և դրամահավաք հայտարարել :Չէ որ Հայաստանում հիմա,ամեն ինչ կարելի է գնել:
Հարգելիներս, հավատացեք: այս հարցը կուլիսների հետեվում աճուրդի է դրված: Դատական նախադեպի ինստիտուտ (jurisprudence) հայաստանում չկա, իսկ համակարգը նմանվում է սպէկուլյատիվ բորսայի, իհարկէ ՛արդարադատություն անվամբ դիմակի տակ: Նույնիսկ մարդու իրավունքների դատարանը այս երկրին չի փրկի, որովհետեվ порча бушует: дихлофосա պետք:

Կարդացողի Հավանություն՝ 2 0

Գրեք Ձեր կարծիքը

Ձեր կարծիքը միմիայն բուն թեմայի վերաբերյալ։
Մի գրեք Ձեր կարծիքը ի պատասխան այլ կարծիքի։
Մի գրեք Ձեր կարծիքը լատինատառ «հայերենով»։ Mi grek dzer kartsiq@ latinatar hayerenov.
Մի գրեք «Լինքեր». ցանկացած այլ կայքէջի հասցե, որը դուրս է գտնվում Լույս Աշխարհ կայքի տիրույթից, կարող է պատճառ լինել Ձեզ «spam» ցուցակում գցելու, կամ ընդհանրապես արգելափակելու գործում։
Թեմայից դուրս նյութեր տրամադրելու համար օգտագործեք Հետադարձ Կապի միջոցը։
Ձեր գրառումները կհրատարկվեն այն ժամանակ, երբ մեզ հարմար է։
Եթե չեք ցանկանում այստեղ գրառումներ կատարել, ապա Ձեր իսկ կամքով գտեք մեկ այլ գրառելու վայր՝ Ֆորում, Մատյան եւ այլն, եւ կատարեք Ձեր գրառումները այնտեղ։

Name - Անուն - required

Email - Էլ-փոստ - required, never published

Website - Ձեր կայքի հասցեն

Comment